Qadın voleybolçular arasında Azərbaycan çempionatında (Yüksək Liqa) 2023/2024 mövsümünün 3-cü dövrəsinə start verilib.
Arena.az xəbər verir ki, bu gün Gənclər və İdman Nazirliyinin Voleybol Mərkəzində 11-ci tur çərçivəsində iki görüş keçirilib.
İlk olaraq, meydana “Milli Aviasiya Akademiyası” və “Gəncə” komandaları çıxıblar. Gərginliyi ilə yadda qalan matçda qalib tay-brekdə müəyyənləşib. Bu hissədə daha dəqiq oynayan “Gəncə” 3:2 hesabı ilə qalib gəlib.
Günün növbəti qarşılaşması “Murov” və “Abşeron” komandaları arasında olub. İlk setdən təşəbbüsə yiyələnən “Murov” üstünlüyünü sonadək qoruyub və 3:0 hesablı qələbə qazanıb.
Beləliklə, xallarının sayını 26-ya çatdıran (9 qələbə) “Murov” liderliyə yüksəlib. “Azərreyl” 24 xalla (8 qələbə) 2-ci, “Abşeron” 21 xalla (7 qələbə) 3-cü, “Gəncə” 15 xalla (5 qələbə) 4-cü, “Milli Aviasiya Akademiyası” 10 xalla (3 qələbə) 5-ci, qələbəsi və xalı olmayan UNEC isə sonuncu pillədədir.
11-ci turun son oyunu sabah UNEC və “Azərreyl” komandaları arasında olacaq.
Yüksək Liqa
11-ci tur
30 yanvar
“Milli Aviasiya Akademiyası” – “Gəncə” 2:3 (26:24, 19:25, 15:25, 25:19, 11:15)
“Murov” – “Abşeron” 3:0 (25:20, 25:18, 25:22)
31 yanvar
18:00. “Azərreyl” – UNEC
