“Qarabağ”ın prezidenti Tahir Gözəl Azərbaycanın Xorvatiyadakı fövqəladə və səlahiyyətli səfiri Anar İmanovla görüşüb.
Arena.az Ağdam klubunun mətbuat xidmətinə istinadən xəbər verir ki, görüş Azərbaycanın Xorvatiyadakı səfirliyində baş tutub.
Anar İmanovun dəvəti ilə gerçəkləşən görüş UEFA Çempionlar Liqasının pley-off mərhələsinin ilk oyunları çərçivəsində bu gün keçiriləcək “Dinamo” (Zaqreb, Xorvatiya) – “Qarabağ” matçı ərəfəsində təşkil olunub. Klubun Xorvatiya səfərində də komandanı tək qoymayan Tahir Gözəl səfirə səmimi dəvətə və qəbula görə təşəkkür edib.
Görüş zamanı “Qarabağ”ın uğurları, klubun artıq bir brendə çevrilməsi və bütün dünyanın bu komanda ilə, onun tarixi ilə maraqlanması barədə danışılıb. Anar İmanov komandaya uğurlar arzulayıb və oyunu stadiondan izləyəcəyini bildirib.
Qeyd edək ki, “Dinamo” – “Qarabağ” qarşılaşması bu gün Bakı vaxtı ilə saat 23:00-da başlayacaq.
