“Barselona”nın və Almaniya yığmasının qapıçısı Mark-Andre ter Ştegen “Bayern”in alman qapıçısı Manuel Noyerə müraciət edib.
Arena.az məlumat verir ki, Ter Ştegen həmkarı Manuel Noyerin Almaniya yığmasında çıxışını başa vurması haqda qərarına münasibətini açıqlayıb:
“Almaniya yığmasında uğurlu karyeran münasibətilə səni təbrik edirəm. Sən – əbədi dünya çempionu və alman futbolunun əfsanəsisən!” – Ter Stegen özünün sosial şəbəkə hesabı üzərindən paylaşıb.
Vurğulayaq ki, bundestimin məşqçilər qərargahının Noyeri Almaniya yığmasında əsas qapıçı seçməsi səbəbindən uzun müddət qapıçılar arasında münaqişələr yaşanırdı.
Xatırladaq ki, Manuel Noyer avqustun 21-də Almaniya yığmasındakı çıxışını başa vurduğunu açıqlamışdı.
Manuel Noyer kapitanı olduğu, 2009-cu ilin iyununda debüt etdiyi Almaniya yığmasının heyətində bütövlükdə 124 oyun keçirib, 118 qol buraxıb, 51 oyunda qapısını toxunulmaz saxlayıb.
Alman qapıçı “bundestim”lə DÇ-2014-ün qalibi olub. Noyer həmçinin Almaniyanın U-21 yığması ilə Avropa çempionatını (2009) qazanıb.
Manuel Noyer “Şalke”nin yetirməsidir. Alman qapıçı 2011-ci ilin iyulundan “Bayern”də çıxış edir. Noyer Münhen klubuna 30 milyon avro müqabilində elə, “Şalke”dən transfer edilib.
Qapıçının Münhen klubu ilə cari müqaviləsi 2025-ci ilin iyun ayının sonuna qədər qüvvədədir. Almaniya nəhəngi komandanın kapitan sarğısını məhz veteran Noyerə etibar edib.
Geridə qalmış 2023/2024 mövsümündə Noyer “Bayern”in heyətində bütün yarışlarda 33 oyuna çıxıb, 43 qol buraxıb, 11 oyunda qapısının toxunulmazlığını təmin edib. Bu mövsüm hələlik 1 oyun keçirmiş qapıçının “Bayern” karyerası bütövlükdə 522 oyun, 427 buraxılmış qol və 245 “quru” matçdan ibarətdir.
Manuel Noyer futbol uğurlarına məhz “Bayern”də çıxış etdiyi müddətdə nail olub. “Bayern”lə Noyer 11 dəfə Bundesliqanın, 6 dəfə Almaniya Kubokunun, 7 dəfə Almaniya Super Kubokunun, 2 dəfə Çempionlar Liqasının, 2 dəfə UEFA Super Kubokunun, 2 dəfə FIFA Klub Dünya Kubokunun qalibi olub. Həmçinin Maneul 2 dəfə (2011, 2014) Bundesliqada mövsümün futbolçusu seçilib.
