İngiltərənin “Brentford” klubu heyətini yeni futbolçu ilə gücləndirib. Arena.az xəbər verir ki, Premyer Liqa təmsilçisi Çempionşipdə mübarizə aparan “Hall Siti”nin gənc forvardı Kin Luis-Potteri transfer edib.
Bu barədə hər iki klub rəsmi saytları vasitəsilə məlumat yayıb. 21 yaşlı futbolçunun keçidi “Brentford”a 16 milyon funt-sterlinqə başa gəlib. Lakin “Hall Siti”nin bonuslarla daha 4 milyon funt-sterlinq qazanmaq şansı var. İngilis futbolçu yeni klubu ilə 6 illik müqaviləyə imza atıb.
Kin Luis-Potter “Hall Siti”nin öz yetirməsidir. O, peşəkar karyerasına 2019-cu ildə məhz bu komandada başlayıb. Doğma komandasının heyətində 122 matça çıxmış futbolçu, bu görüşlərdə 30 qol vurub. O, qısa müddət “Bredford” klubunda icarədə də oynayıb. Gənc futbolçu həm də İngiltərənin U-21 milli komandasının üzvüdür. O, bu komandada 4 oyuna 1 qol vurub.
Luis-Potteri “Brentford”a satan “Hall Siti” onun əvəzində kolumbiyalı hücumçu Oskar Estupinanı transfer edib. Portuqaliyanın “Vitoriya Gimaraynş” klubundan transfer olunmuş 25 yaşlı futbolçu ilə 3 illik müqavilə imzalanıb. Portuqaliya təmsilçisindən azad agent kimi ayrılmış futbolçu yeni klubuna təzminat xərci çəkdirməyib.
Oskar Estupinan karyerasına “Onse Kaldas” komandasında başlayıb. O, 2017-ci ildən Portuqaliya təmsilçisində forma geyinən hücumçu, geridə qalan mövsümdə 33 matça çıxıb, 16 qol vurub, 3 məhsuldar ötürmə edib. “Vitoriya Gimaraynş” onu 2019-cu ildə Ekvadorun “Barselona”, 2019/20 mövsümündə isə Türkiyənin “Dənizlispor” klublarına icarəyə də vermişdi.
Xatırladaq ki, “Hall Siti” klubunun sahibi türkiyəli Acun Ilıcalıdır. Çempionşip klubunda bu yay ilk ayrılıq məhz Luis-Potterin sayəsində gerçəkləşib. Klub əvəzində Tobias Fiqeyredo, Ozan Tufan, Allahyar Sayyadmaneş, Jan Mişel Seri və Doğukan Siniki transfer edib. “Hall Siti”nin hədəfi qarşıdakı mövsümdə İngiltərə Premyer Liqasına vəsiqə qazanmaqdır.
