Futbol üzrə İsrail yığma komandasının qapıçısı Daniel Perets Almaniya nəhəngi “Bayern”dən birdəfəlik ayrılaraq “Sauthempton”a keçib.
Arena.az xəbər verir ki, bu barədə İngiltərə klubu rəsmi saytı vasitəsilə məlumat yayıb.
Perets 2025/2026-cı illər mövsümünün qış fasiləsi zamanı icarə əsasında “Sauthempton”a qoşulmuşdu. Sözügedən klub Peretsin yarım mövsümlük çıxışından razı qaldığı üçün onun transfer hüquqlarını da alıb. “Sauthempton” bunun üçün “Bayern”ə 8 milyon avro ödəyib. Daniel bu klubla 4 illik müqaviləyə imza atıb.
Xatırladaq ki, Perets geridə qalmış mövsümdə “Sauthempton”un heyətində 26 oyuna çıxıb, 24 qol buraxıb, 9 matçda qapısını toxunulmaz saxlayıb.
Daniel Perets Təl-Əviv “Makkabi”sinin yetirməsidir. O, “Bayern”ə 2023-cü ilin avqust ayında 5 milyon avro müqabilində keçmişdi. İsrailli qapıçı Münhen təmsilçisinin heyətində cəmi 7 oyuna çıxıb, 7 qol buraxıb, 2 matçda qapısını toxunulmaz saxlayıb. Ölkəsində Təl-Əviv “Beytar”ının da formasını geyinmiş qolkiper “Sauthempton”dan öncə “Hamburq”da da icarədə olub.
Daniel Perets İsrailin aşağı yaş qrupları üzrə müxtəlif yığmalarında oynayıb, 2022-ci ilin noyabr ayında isə əsas millidə debüt edib. O, İsrail millisinin heyətində 12 oyuna çıxıb, 20 qol buraxıb, 5 oyunda qapısını toxunulmaz saxlayıb.
“Transfermarkt” internet-portalı 25 yaşlı qapıçının transfer dəyərini 4 milyon avro məbləğində qiymətləndirir.
