İngiltərənin “Çelsi” klubunun danimarkalı qapıçısı Filip Yorgensen bundan sonra “Strasburq”un uğurları üçün çalışacaq.
Arena.az xəbər verir ki, bu barədə Fransa klubunun mətbuat xidməti məlumat yayıb.
Liqa 1 təmsilçisi 24 yaşlı qolkiperi bir mövsümlük icarəyə götürüb. Yorgensen 2027-ci ilin 30 iyununadək “Strasburq”da çıxış edəcək. Fransa klubunun onu birdəfəlik satın almaq hüququ olmayacaq.
“Malmö”nün yetirməsi olan Filip Yorgensen peşəkar karyerasına “Vilyarreal”da başlayıb. O, “Çelsi”yə 2024-cü ilin yayında 24,5 milyon avro müqabilində məhz İspaniya klubundan keçib. Filipin “zadəganlar”la 2031-ci ilin 30 iyununa qədər müqaviləsi mövcuddur.
Yorgensen ötən mövsüm London təmsilçisinin heyətində 12 oyuna çıxıb və 17 qol buraxıb, 2 matçda qapısını toxunulmaz saxlayıb.
Yorgensen İsveçdə dünyaya göz açmasına, bu ölkənin U-16 və U-17 yığmalarında oynamasına baxmayaraq, 2021-ci ildə Danimarkanın U-21 yığmasında, 2025-ci ildə isə əsas millidə forma geyinməyə başlayıb.
“Transfermarkt” internet-portalı 24 yaşlı qolkiperin transfer dəyərini 15 milyon avro məbləğində qiymətləndirir.
