İngiltərənin “Mançester Siti” klubu bir “transfer pəncərəsi” ərzində futbolçu keçidlərinə xərclənmiş vəsaitə görə rekord müəyyənləşdirib.
Arena.az “Transfermarkt” portalına istinadən xəbər verir ki, “şəhərlilər” yay transfer dönəmində 526 milyon avro xərcləyiblər.
Bununla da klub 2025-ci ildə 483 milyon avro xərcləmiş “Liverpul”un rekordunu yeniləyib.
Mançester təmsilçisi yayda 9 futbolçu transfer edib. Entso Fernandes 145 milyon avro, Elliot Anderson 135 milyon avro, Əyyub Buaddi isə 95 milyon avroya alınıb.
İliman Ndiayenin transferinə 70 milyon avro, Allana 37,5 milyon avro, Matis Deturbeyə 25 milyon avro, Ceremi Monqaya isə 11,7 milyon avro ödənilib.
Qapıçılar Xeronimo Rulyi və Pirs Çarlzın hər biri 3,5 milyon avroya heyətə cəlb olunublar.
Qeyd edək ki, Entso Fernandes həm də “Mançester Siti” tarixinin ən bahalı transferidir. Bu keçid həmçinin futbol tarixinin ən bahalı 5 transferindən biri hesab olunur.
