Almaniyanın “Bayern” klubunun qapıçısı Manuel Noyer Bundesliqa təmsilçisi ilə müqavilənin müddətini artırıb. Arena.az xəbər verir ki, bu barədə Münhen klubunun rəsmi saytı məlumat yayıb.
Tərəflər arasındakı yeni müqavilə 2024-cü ilin yayına kimi nəzərdə tutulub. Onun əvvəlki sözləşməsinin müddəti bu yay başa çatırdı.
Manuel Noyer 2011-ci ildən “Bayern”də çıxış edir. 36 yaşlı futbolçu 2017-ci ildən komandanın kapitanıdır.
Noyer 2021/22 mövsümündə Almaniya klubunun heyətində bütün turnirlərdə 38 oyun keçirib, qapısından 36 top buraxıb.
O, “Bayern”lə 10 Almaniya çempionluğu, 5 Almaniya kuboku qazanıb və 6 dəfə Almaniya Super Kubokunun qalibi olub. Noyer həmçinin, iki dəfə Çempionlar Liqasının, Klublararası Dünya Çempionatının və UEFA Super Kubokunun qalibi adını qazanıb.
“Şalke”nin yetirməsi olan Noyer 2011-ci ilin yayında 30 milyon avro qarşılığında indiki klubuna transfer olunmuşdu. O, kapitanı olduğu Almaniya yığmasında 109 oyun keçirib. Qolkiper 2011 və 2014-cü illərdə ölkəsində ilin yaxşı futbolçusu da seçilib.
