“Qarabağ”ın yarımmüdafiəçisi Patrik Andrade zədəsini sağaldıb.
Arena.az xəbər verir ki, bu barədə kabo-verdeli yarımmüdafiəçi klubun rəsmi saytına açıqlamasında deyib.
28 yaşlı oyunçu Azərbaycan Kubokunun yarımfinal mərhələsinin “Sumqayıt”la cavab matçına hazır olduğunu bildirib:
“Premyer Liqanın 23-cü turunda “Səbail”lə matçdan sonra sol ayağımın arxa tərəfində ağrılar hiss etməyə başladım. MRT-dən (Maqnit Rezonans Tomoqrafiya) sonra məlum oldu ki, birinci dərəcəli yırtıq var. Bu səbəbdən bir neçə oyunu buraxmalı oldum. Artıq komanda ilə məşqlərə başlamışam. Özümü normal hiss edirəm. Baş məşqçimiz şans verərsə, meydana çıxmağa hazıram”.
Qeyd edək ki, aprelin 29-da Tofiq Bəhramov adına Respublika Stadionunda keçiriləcək “Qarabağ” – “Sumqayıt” görüşünə saat 17:00-da start veriləcək. Andradenin bu oyunda iştirak edib-etməyəcəyinə oyun günü aydınlıq gələcək. Sumqayıtda baş tutan ilk oyunda qalib müəyyənləşməyib – 0:0.
