Fransa çempionu PSJ heyətini yeni futbolçu ilə gücləndirib. Arena.az xəbər verir ki, paytaxt klubu Portuqaliyanın “Portu” komandasının yarımmüdafiəçisi Vitinyanı transfer edib.
Bu barədə Liqa 1 təmsilçisinin rəsmi saytı məlumat yayıb. 22 yaşlı futbolçu ilə müddəti 2027-ci ilin yayınadək olan müqavilə imzalanıb. Onun transferinin paytaxt təmsilçisinə 40 milyon avroya başa gəldiyi bildirilir.
“Portu”nun yetirməsi olan Vitinyanın Portuqaliya klubu ilə 2024-cü ilin iyununadək müqaviləsi var idi. O, 2021/22 mövsümündə icarə əsasında İngiltərənin “Vulverhempton” komandasında çıxış edib. Portuqaliya millisinin də üzvü olan yarımmüdafiəçi ötən mövsüm bütün yarışlarda 47 oyuna 4 qol və 5 məhsuldar ötürmə ilə yadda qalıb.
PSJ öz yarımmüdafiəçisi Xavi Simonsu da Niderlandın PSV klubuna satıb. Niderlanddan olan 19 yaşlı futbolçu da yeni klubu ilə 5 illik müqavilə bağlayıb.
İspaniyanın “Barselona” klubunun yetirməsi olan Xavi Simons 2019-cu ildən PSJ-də idi. Niderlandın aşağı yaş qrupları üzrə yığmalarında da oynayan futbolçu Paris təmsilçisinin əsas komandasında 11 oyun keçirib.
