“Qarabağ” 2020/21 mövsümü üçün ilk transferini reallaşdırıb. Arena.az xəbər verir ki, Ağdam təmsilçisi braziliyalı yarımmüdafiəçi Kadi Borxes Malinovski ilə anlaşıb.
Hələlik klub bu transferi açıqlamağa tələsmir. Düzdü, Ağdam təmsilçisi bu gün yeni transferlə bağlı iki anons edib. Amma bu gizli anonslarda futbolçunun adı açıqlanmayıb. Hətta ikinci anons zamanı klubun sosial şəbəkə hesablarında yayımlanan videolarda Malinovskinin üzü də göstərilməyib. Sadəcə, bu transferin sabah açıqlanacağı diqqətə çatdırılıb.
Qeyd edək ki, Malinovski hücumameylli yarımmüdafiəçidir. “Koritiba”nın yetirməsi olan futbolçunun son klubu Portuqaliya 2-ci Liqasında mübarizə aparan “Vilafrankense” olub. Kadi ötən mövsüm bu komandanın heyətində meydana çıxdığı 27 matçda 5 qol vurub. 25 yaşlı futbolçu bu klubdan öncə Portuqaliyada “Eştoril”in də uğurları üçün çalışıb.
