Futbol üzrə İspaniya millisinin üzvü, “Qızıl top”un sahibi Rodri “Barselona”ya keçidindən sonra “Mançester Siti” ilə vidalaşıb.
Arena.az xəbər verir ki, Kataloniya klubu 30 yaşlı yarımmüdafiəçi ilə 2030-cu ilin yayına qədər müqavilə imzalandığını rəsmən açıqlayıb.
Bu il keçirilmiş dünya çempionatının ən yaxşı futbolçusunun transferi bonuslarla birlikdə təxminən 76,5 milyon avroya başa gəlib.
Rodri “Mançester Siti”nin rəsmi saytına açıqlamasında İngiltərə klubunda keçirdiyi yeddi ili böyük qürur və minnətdarlıq hissi ilə başa vurduğunu bildirib:
“Birlikdə qazandığımız uğurlarla böyük qürur duyuram və çoxsaylı gözəl xatirələrə görə dərin minnətdarlıq hissi keçirirəm. Bu illər ərzində birlikdə yaratdıqlarımız həqiqətən xüsusi və unudulmazdır”.
İspaniyalı futbolçu komanda yoldaşlarına və klubda birlikdə çalışdığı bütün insanlara da təşəkkür edib. O, azarkeşlərin xüsusi yerə sahib olduğunu vurğulayıb:
“İlk gəldiyim gündən Mançesterdə özümü evimdə hiss etməyimə kömək etdiniz. Yaxşı və pis günlərdə mənə və komandaya möhtəşəm dəstək verdiniz. Qarşısında oynamaq mənim üçün böyük zövq idi. Ürəyim həmişə mavi olaraq qalacaq. Bu yeddi il inanılmaz idi. “Mançester Siti” həmişə qəlbimdə qalacaq”.
