Azərbaycanın voleybol üzrə qadınlardan ibarət milli komandası bu gün Qızıl Avropa Liqasında növbəti oyununa çıxıb.
Arena.az xəbər verir ki, Faiq Qarayevin rəhbərlik etdiyi yığmamız Rumıniyada təşkil olunmuş 2-ci turun ilk matçında yerli komanda ilə qarşılaşıb.
Rumıniya kollektivi ilə oyun yığmamız üçün uğursuz alınıb. Belə ki, voleybolçularımız görüşdən 0:3 (19:25, 15:25,10:25) hesabı ilə məğlub ayrılıblar.
Xatırladaq ki, voleybol yığmamız daha əvvəl Xorvatiyada keçirilmiş ilk mərhələdə meydan sahibləri üzərində (3:0) qələbə qazansa da, Slovakiyaya (0:3) məğlub olmuşdu.
Azərbaycan millisi Rumıniyadakı digər oyununu sabah İsveç yığmasına qarşı keçirəcək. Oyuna Bakı vaxtı ilə saat 16:30-da start veriləcək.
Yeri gəlmişkən, bu gün kişilərdən ibarət yığma komandamız da 2-ci turun ilk görüşündə Belçikanın qonağı olub. Fərid Cəlalovun rəhbərlik etdiyi millimiz növbəti məğlubiyyətinə üzülüb – 0:3 (19:25, 16:25, 17:25).
Xatırladaq ki, kişilərdən ibarət millimiz Bakıda təşkil olunan 1-ci turda da Rumıniya və Ukraynaya eyni hesabla yenilmişdi – 0:3.
Sabah Azərbaycan yığmasını Belçikada Şimali Makedoniya kollektivi ilə görüş gözləyir. Bu oyuna isə saat 17:30-da start veriləcək.
