Türkiyənin “Alanyaspor” klubu qapıçısı Xose Karlos Marafona ilə yollarını ayırıb. Arena.az xəbər verir ki, bu barədə Super Liqa təmsilçisinin rəsmi saytı məlumat yayıb.
Tərəflər arasındakı müqaviləyə qarşılıqlı razılıq əsasında xitam verilib. Onun müqaviləsi bu mövsümün sonuna kimi idi.
Xose Karlos Marafona 2019/20 mövsümündə Portuqaliyanın “Braqa” klubundan azad agent kimi “Alanyaspor”a keçmişdi. O, bu mövsüm Super Liqa təmsilçisində meydana çıxmaq şansı qazanmayıb.
“Alanyaspor” formasıyla 103 matça çıxan Marafona, qapısından 124 qol buraxıb. O, 25 oyunda isə qapısını toxunulmaz saxlamağı bacarıb. Portuqaliyadan olan 35 yaşlı qolkiper karyerası ərzində “Varzim”, “Maritimo”, “Aves”, “Moreyrense”, “Pasuş de Ferreyra” və “Braqa”da da oynayıb. O, Portuqaliya yığmasında 1 oyun keçirib.
