“Sabah”ın qapıçısı Yusif İmanov Azərbaycan çempionatında 10-cu quru oyununu keçirib. Arena.az xəbər verir ki, gənc qolkiperin yubileyi Azərbaycan Premyer Liqasının 13-cü turunun “Səbail”lə görüşünə təsadüf edib.
Onun komandası bu oyundan 2:0 hesablı qələbə ilə ayrılıb. Nəticədə Yusif mövsümdəki 13-cü matçında 7-ci dəfə qapısını toxunulmaz saxlayıb. Premyer Liqada ötən çempionat debüt edən İmanov 7 görüşdən üçündə qol buraxmayıb.
Yusif İmanov 20 yaş 40 günlüyündə quru oyunların sayını 10-a çatdırıb. O, XXI əsrdə Azərbaycan çempionatlarında 10 matçda qol buraxmayan ən gənc qapıçıdır.
Bu, ümumilikdə yarışın 30 illik tarixində 7-ci nəticədir. Yalnız 6 qapıçı “10”a daha gənc yaşında çatıb ki, bunların hamısı ötən əsrdə qeydə alınıb. Mütləq rekord isə Dmitri Kramarenkoya məxsusdur – 17 yaş 297 günlük.
