“Nyukasl”ın baş məşqçisi, ingilis mütəxəssis Eddi Hau “sağsağanlar”ın Çempionlar Liqasında PSJ ilə oyununun (1:1) nəticəsinə yekun vurub.
Arena.az BBC-yə istinadən Haunun müvafiq xüsusda fikirlərini diqqətinizə çatdırır:
“Mən hələ də bununla barışmağa çalışıram. Özümü çox pis hiss edirəm, amma eyni zamanda bu gün futbolçularımın göstərdiklərindən çox razıyam. Onların fədakarlığı, icrası… Bəxtimizdən istifadə etdik, amma sonda bəxtimiz gətirmədi. Bunun penalti olduğunu düşünmürəm.
Bu təkrarlar topun nə qədər sürətlə hərəkət etdiyini nəzərə almırlar. Əvvəlcə, sinəsinə dəydi. O, əli birinci vursa belə, yenə də penalti olmayacaqdı, çünki top çox yaxından gəlirdi. Top əvvəlcə sinəsinə, sonra isə aşağıda olan qoluna dəydikdə, bu, penalti deyil.
Xülasə etməyə icazəm yoxdur. Açığı, içimdəki fikirləri ifadə edə bilmirəm, çünki başım cəncələ düşəcək. Amma bu məqama qədər hakim yaxşı hökm verirdi”, deyə Eddi Hau fikrini tamamlayıb.
Hazırda “Nyukasl”ın yer aldığı “F” qrupuna 10 xalla “Borussiya Dortmud” başçılıq edir, alman komandası ələmə mərhələsinə vəsiqəsini təmin edib. PSJ-nin 7 xalı, “Nyukasl” və “Milan”ın isə 5 xalı var. Göründüyü kimi, qrup ikinciliyi uğrunda qızğın mübarizə sonuncu, 6-cı tura qalıb.
