Kişi voleybolçuların Azərbaycan çempionatında (Yüksək Liqa) 2023/2024 mövsümünün ilkin mərhələsinə yekun vurulub.
Arena.az xəbər verir ki, bu gün son tur çərçivəsində iki qarşılaşma keçirilib.
“Murov” Voleybol Klubunun idman zalında təşkil olunan “Neftçi” və MOİK görüşündə birincilər 3:0 hesablı qələbə qazanıblar.
Gənclər və İdman Nazirliyinin Voleybol Mərkəzində baş tutan oyunda isə “Murov” və “Azərreyl” kollektivləri üz-üzə gəliblər. Turnir cədvəlində birinci yerin sahibini müəyyən edən qarşılaşma gərginliyi ilə yadda qalıb. Bu matç “Azərreyl”in 3:1 hesablı qələbəsi ilə yekunlaşıb.
Bununla da ilkin mərhələni lider kimi başa vuran “Azərreyl”, ikinci olan “Murov” və üçüncü pillədəki “Neftçi” pley-offa yüksəliblər. Pley-off mərhələsinə növbəti vəsiqəni qazanan dördüncü komanda isə MOİK olub. Belə ki, çempionatdakı oyunlarının dekabr ayından təxirə salınması ilə bağlı müraciət edən “Xarı Bülbül Şuşa” və “Xarı Bülbül Laçın” komandaları bu günə kimi AVF-yə rəsmi olaraq fəaliyyətlərinin dayandırılmasına dair heç bir məlumat verməyiblər. Bu səbəbdən həmin komandaların çempionatdakı bütün qarşılaşmalarında rəqiblərinə texniki qələbə verilib.
Beləliklə, altı dövrənin nəticələrinə görə, yarımfinalda ilkin mərhələnin birincisi olan “Azərreyl” dördüncü yerin sahibi MOİK-lə, ikinci olan “Murov” isə üçüncü yeri tutan “Neftçi” ilə qarşılaşacaq. Bu mərhələ iki qələbəyədək davam edəcək. İki oyundan sonra tərəflər hərəyə bir qələbə qazanarlarsa (setlər də bərabər olarsa), finala vəsiqənin sahibi qızıl setdə müəyyənləşəcək.
Pley-off mərhələsinin oyunlarının keçirilmə yeri və vaxtı haqqında əlavə məlumat veriləcək.
Yüksək Liqa
8 aprel
“Neftçi” – MOİK 3:0 (25:16, 25:14, 25:15)
“Murov” – “Azərreyl” 1:3 (25:22, 22:25, 18:25, 16:25)
