Futbol üzrə Portuqaliya yığmasının hücumçusu Joao Feliks DÇ-2022-nin seçmə mərhələsi çərçivəsində Azərbaycan millisinə qarşı keçirdikləri oyunu şərh edib.
Arena.az xəbər verir ki, Madrid “Atletiko”sunun formasını geyinən 22 yaşlı futbolçu 1:0 hesabıyla qalib gəldikləri matçla bağlı bunları söyləyib:
“Azərbaycanla oyunda saysız-hesabsız qol imkanlarımız oldu. Qələbə qazanmaq əsas hədəfimiz idi və bu hədəfə çatdıq”.
Joao Feliks Serbiyaya qarşı keçirəcəkləri növbəti oyundan da söz açıb:
“Bu qarşılaşma Azərbaycanla matçdan tamam fərqli olacaq. Amma qalib gələcəyimizə ümid edirik. Onlar açıq oyuna üstünlük verir. Bu isə bizim üçün sərfəli ola bilər”.
Qeyd edək ki, Portuqaliya yığması martın 27-də Serbiyanın, martın 30-da isə Lüksemburqun qonağı olacaq. Azərbaycan millisi isə növbəti oyunlarını Qətər və Serbiyaya qarşı keçirəcək.
