Bu gün AFFA İntizam Komitəsinin iclası keçirilib, Premyer Liqa, Əvəzedicilər Liqası və Birinci Liqa ilə bağlı bəzi qərarlar qəbul olunub.
Arena.az xəbər verir ki, bu turnirlərin 2024-cü ilə təsadüf edən sonuncu turlarının oyunları ilə bağlı qərarların siyahısını təqdim edirik:
Azərbaycan Premyer Liqası, 18-ci tur
“Turan Tovuz” – “Neftçi” oyununda “Turan Tovuz”un 4 futbolçusu sarı vərəqə aldığına görə Tovuz komandası 700 manat cərimə edilib.
Əvəzedicilər Liqası, 18-ci tur
“Turan Tovuz-2” – “Neftçi-2” oyununda “Turan Tovuz”un 6 futbolçusu sarı vərəqə aldığına görə Tovuz komandası 70 manat cərimə edilib. “Neftçi”nin 4 futbolçusu sarı vərəqə aldığına görə paytaxt komandası da 70 manat cərimə edilib.
Birinci Liqa, 11-ci tur
“İmişli” – “Cəbrayıl” oyununda “İmişli”də 4 nəfər sarı vərəqə aldığına görə sözügedən klub 70 manat cərimə edilib. Oyun bitdikdən sonra meydançaya kənar şəxslər daxil olduğuna görə “İmişli” klubu 80 manat cərimə edilib. “Cəbrayıl”ın 4 futbolçusu sarı vərəqə aldığına görə sözügedən klub 70 manat cərimə edilib.
“Mingəçevir” – “Qəbələ” oyununun 89-cu dəqiqəsində “Mingəçevir”in futbolçusu Elvin Əliyev ikinci sarıdan qırmızı vərəqə aldığına görə 1 oyun cəzalanıb. “Mingəçevir” klubu buna görə 50 manat cərimə edilib. Oyunun 90-cı dəqiqəsində “Mingəçevir”in digər futbolçusu Aqil Nəsibov da ikinci sarıdan qırmızı vərəqə aldığına görə 1 oyun cəzalanıb. “Mingəçevir” buna görə də 50 manat cərimə ödəyəcək.
“Difai” – MOİK oyununun 63-cü dəqiqəsində “Difai”nin futbolçusu Bəşir Ayralov ikinci sarıdan qırmızı vərəqə aldığına görə 1 oyun cəzalanıb, klubu 50 manat cərimə edilib. Oyunun 73-cü dəqiqəsində “Difai”nin futbolçusu Seymur Əliyev ciddi qayda pozuntusuna görə birbaşa qırmızı vərəqə aldığı üçün 2 oyun cəzalanıb. “Difai” buna görə 150 manat cərimə edilib. Oyunun 90+3-cü dəqiqəsində “Difai”nin heyətində adı matçın protokolunda olmayan 10 nömrəli futbolçu Tahir Zeynalov oyuna daxil olduğuna görə “Difai” komandasına 0:3 hesablı texniki məğlubiyyət verilib. “Difai” buna görə 400 manat cərimə də ödəyəcək.
