Bu gün AFFA İntizam Komitəsinin növbəti iclası keçirilib, Premyer Liqa və Əvəzedicilər Liqası ilə bağlı qərarlar açıqlanıb.
Arena.az xəbər verir ki, müzakirələrdən sonra aşağıdakı qərarlar qəbul olunub:
Misli Premyer Liqası, 23-cü tur
“Sabah” – “Kəpəz” oyununda “Kəpəz”in 5 futbolçusu sarı vərəqə aldığına görə Gəncə klubu 700 manat cərimə edilib. Bu oyunda meydançaya kənar şəxs daxil olduğuna görə “Sumqayıt” klubu 800 manat cərimə edilib. Oyunun 2-ci hissəsi “Sumqayıt”ın meydançaya gec daxil olması səbəbindən 4 dəqiqə gec başladığı üçün sözügedən klub 1500 manat cərimə edilib.
Əvəzedicilər Liqası, 23-cü tur
“Səbail-2” – “Araz-Naxçıvan-2” oyununda “Səbail”in 4 futbolçusu sarı vərəqə aldığına görə sözügedən komanda 70 manat cərimə edilib. “Araz-Naxçıvan”ın futbolçusu Nihad Əmrahzadə ikinci sarıdan qırmızı vərəqə aldığı üçün 1 oyun cəzalanıb. “Araz-Naxçıvan” komandası buna görə 50 manat cərimə edilib.
“Qəbələ-2” – “Qarabağ-2” oyununda “Qarabağ”ın futbolçusu İbrahim Camalov ciddi qayda pozuntusuna görə birbaşa qırmızı vərəqə aldığı üçün 2 oyun cəzalanıb. Ağdam komandası buna görə 150 manat cərimə edilib.
“Neftçi-2” – “Zirə-2” oyununda “Zirə”nin 5 futbolçusu sarı vərəqə aldığına görə sözügedən komanda 70 manat cərimə edilib.
“Sumqayıt-2” – “Turan Tovuz-2” oyununda “Sumqayıt”ın 4 futbolçusu sarı vərəqə aldığına görə sözügedən komanda 70 manat cərimə edilib.
Digər liqalar
AFFA-nın bayrağı altında təşkil olunmuş müxtəlif yarışlarla da bağlı bəzi diqqət çəkən cəzalar var. Həmin qərarları təqdim edirik:
Region Liqasının “Mil” (Beyləqan) – “Ümid” (Saatlı) oyununda “Mil”in rəhbəri Röyal Babayev hakimi təhqir etdiyinə görə birbaşa qırmızı vərəqə aldığı üçün 5 oyun cəzalanıb.
Region Liqasının “Göyəzən” – “Bərdə” oyunununda “Bərdə”nin futbolçusu Rəcəb Zaidov hakimi təhqir etdiyinə görə birbaşa qırmızı vərəqə aldığı üçün 4 oyun cəzalanıb.
Region Liqasının “Lokomotiv Baku” – İCBFA oyunununda “Lokomotiv Baku”nun futbolçusu Əli Nəzərovun əvəzinə protokolda adı qeyd edilməyən futbolçu iştirak etdiyinə görə “Lokomotiv Baku”ya 0:3 hesablı texniki məğlubiyyət verilib.
U-14 Liqasının “Qafqaz Arena” – “Viktoriya Zaqatala” oyunu “Viktoriya Zaqatala” təyin edilən vaxtda meydanda olmadığına görə baş tutmadığı üçün bu komandaya 0:3 hesablı texniki məğlubiyyət verilib. “Viktoriya Zaqatala” komandası artıq 3-cü dəfədir ki oyuna çıxmadığına görə komanda yarışdan kənarlaşdırılıb.
U-11 Liqasının “Şəmkir” – UGİŞM (Tovuz) oyunu UGİŞM təyin edilən vaxtda meydanda olmadığına görə baş tutmadığı üçün bu komandaya 0:3 hesablı texniki məğlubiyyət verilib.
U-17 Qızlar Liqasının “Sumqayıt” – “Sabah” oyunu “Sumqayıt”ın heyətində yetərsay olmadığına görə baş tutmadığı üçün bu komandaya 0:3 hesablı texniki məğlubiyyət verilib.
