Leverkuzen “Bayer”i ispan mərkəz hücumçusu Borxa İqlesiası “Betis”dən icarə müqaviləsi əsasında heyətinə qatıb.
Arena.az bu barədə “Bayer”in mətbuat xidmətinə istinadən məlumat verir.
İcarə müddəti cari mövsümün – iyun ayının sonuna qədər nəzərdə tutulub. Klublar icarə məbləğini 1 milyon avro məbləğində razılaşdırıblar.
Borxa İqlesias futbola “Kompostela”da qədəm qoyub. Ardınca Borxa “Valensiya”, “La-Roda” və “Vilyarreal”ın futbol akademiyalarından keçərək, böyük futbola gəlib. Borxa karyerası ərzində “Selta”, “Saraqosa”, “Espanyol” və “Betis”də oynayıb.
Cari mövsümün ilk yarısında Borxa “Betis”in heyətində bütün yarışlarda 18 oyuna 2 qol və eyni sayda məhsuldar ötürmə ilə fərqlənib.
Borxa İqlesiasın qənimətlər muzeyində “Betis”lə 2021/2022 İspaniya Kral Kuboku var. Borxa elə həmin yarışın 5 qolla ən sərrast futbolçusu olub.
Borxa İqlesias 2022-ci ilin sentyabrında debüt etdiyi İspaniya yığmasının heyətində 2 oyun keçirib, meydanda 51 dəqiqə olub və məhsuldar fəaliyyəti ilə diqqət çəkməyib.
“Transfermarkt” internet-portalı 31 yaşlı ispan mərkəz hücumçusunun transfer dəyərini 8 milyon avro məbləğində qiymətləndirir.
