Almaniya çempionu “Bayern” futbol üzrə UEFA Çempionlar Liqasında yeni rekorda imza atıb. Arena.az xəbər verir ki, Münhen təmsilçisi qitənin ən nüfuzlu klub turnirində məğlubiyyətsiz oyunlar seriyasını 31-ə çatdırıb.
Sözügedən komanda son olaraq ötən gecə doğma meydanda Plzen “Viktoriya”sını (Çexiya) 5:0 hesabıyla məğlub edib. Bu, münhenlilərin cari mövsümdəki ardıcıl 3-cü qələbəsidir.
Bu qələbə sayəsində “Bayern” həm də Madrid “Real”ına (İspaniya) məxsus rekordu qırıb. Madrid təmsilçisi buna qədər ÇL-də 30 oyunluq məğlubiyyətsiz seriyaya malik idi. Almaniya nəhəngi isə 31 oyunluq məğlubiyyətsiz seriya ilə “Real”ın uğurunu geridə qoyub.
Xatırladaq ki, Almaniya çempionu ÇL-dəki növbəti matçını da məhz “Viktoriya”ya qarşı keçirəcək. Münhenlilərin bu oyundan da qalib ayrılmaq şansı böyükdür.
