“Çelsi” və “Mançester Siti” “zadəganlar”ın xorvat yarımmüdafiəçisi Mateo Kovaçiçin transfer qiyməti ilə bağlı razılığa gələ bilmirlər.
Arena.az bu barədə italyan jurnalist-insayder Fabrisio Romanonun “Twitter” hesabına istinadən xəbər verir.
Mənbənin sözlərinə görə, “Mançester Siti”nin təklifi ilə “zadəganlar”ın istədiyi məbləğ arasında fərq təxminən 2-3 milyon avro təşkil edir. Bununla belə, klublar transferlə bağlı yekun razılığa yaxındırlar.
Bildirilir ki, “Mançester Siti” ilə xorvat yarımmüdafiəçi arasında müqavilənin şəxsi şərtləri artıq razılaşdırılıb.
2022/2023 mövsümündə Kovaçiç “Çelsi”nin heyətində bütün 37 oyuna çıxıb, 2 qol vurub və eyni sayda məhsuldar ötürmə ilə fərqlənib.
29 yaşlı Kovaçiçin London klubu ilə müqaviləsi 2024-cü ilin iyun ayının sonuna qədər qüvvədədir.
“Transfermarkt” internet-portalı Mateo Kovaçiçi 40 milyon avro məbləğində qiymətləndirir.
