Futbol üzrə Azərbaycan millisinin hücumçusu Renat Dadaşov Türkiyənin “Hatayspor” komandasında növbəti matçına çıxıb.
Arena.az xəbər verir ki, futbolçumuzun komandası bu gün Türkiyə Super Liqasının 6-cı turu çərçivəsində “Trabzonspor”la qarşılaşıb.
“Hatayspor” bu rəqiblə doğma meydanda üz-üzə gəlib. Beş qolun qeydə alındığı oyun hataylıların əzmkar qələbəsiylə yekunlaşıb. Belə ki, 72-ci dəqiqəyə qədər 0:2 hesabıyla uduzan Hatay təmsilçisi möhtəşəm əzmkarlıq mnümayiş etdirərək yekunda 3:2 hesablı qələbə qazanıb. Futbolçumuzun komandasına qələbə gətirən qollar 72, 88 və 90+7-ci dəqiqələrdə vurulub.
Dadaşov da əzmkar qələbədə pay sahiblərindən birinə çevrilib. Belə ki, o, 84-cü dəqiqədə meydana buraxılandan sonra komandası 2 qol vurub. Millimizin hücumçusu 90-cı dəqiqədə sarı vərəqə də alıb.
Türkiyə yığmasının sabiq qapıçısı Volkan Dəmirəlin çalışdırdığı “Hatayspor” 6 turdan sonra 10 xalla 20 kollektiv arasında 4-cü pillədə qərarlaşıb.
Xatırladaq ki, Renat Dadaşov müqavilə ilə 2022-ci ilin iyul ayından formasını geyindiyi İsveçrənin “Qrasshopper” klubuna məxsusdur. Türkiyə klubu onu bu mövsümün sonuna kimi satınalma şərti ilə icarəyə götürüb. Dadaşov yeni komandasında 2 oyun keçirsə də, hələlik fərqlənə bilməyib.
