Futbol üzrə Azərbaycan yığmasının hücumçusu Rüfət Dadaşov Almaniyanın “Şalke” klubunun ikinci komandasında növbəti matçına çıxıb. Arena.az xəbər verir ki, o, Almaniyanın Qərb Regional Liqasının 32-ci turu çərçivəsində baş tutan “Boxolt” ilə matçın iştirakçısı olub.
“Şalke” bu rəqiblə doğma meydanda qarşılaşıb. Futbolçumuzun komandası altı qolun qeydə alındığı oyundan məğlubiyyətlə ayrılıb – 2:4.
Rüfət Dadaşov bu görüşə start heyətdə başlayıb və sonadək oynayıb. Komandasının hər iki qolunu da azərbaycanlı hücumçu vurub. O, 22-ci və 52-ci (penaltidən) dəqiqələrdə fərqlənib. Bununla da 31 yaşlı forvard cari mövsümdə vurduğu qolların sayını 12-yə çatdırıb.
“Şalke”nin ikinci komandası bu nəticədən sonra 45 xalla 18 kollektiv arasında 9-cu pillədə qərarlaşıb.
