Cənubi Azərbaycanın ən məşhur futbol komandası olan “Traktor” İran çempionatında növbəti matçına çıxıb. Arena.az xəbər verir ki, Təbriz klubu 2022/2023 mövsümünün sonuncu – 30-cu turu çərçivəsində “İstiqlal” komandası ilə qarşılaşıb.
İspaniyalı Pako Xemesin çalışdırdığı kollektiv bu rəqiblə səfərdə qarşılaşıb. “Traktorçular” meydandan böyük hesablı məğlubiyyətlə ayrılıblar – 1:7. Təbrizlilərin yeganə qolunu 59-cu dəqiqədə Məhəmməd Qənbəri vurub.
Beləliklə, 52 xal toplamış “Traktor” mövsümü 16 iştirakçı arasında 4-cü pillədə başa vurub. Təbriz təmsilçisi keçirdiyi 30 oyundan 15-də qələbə qazanıb, 7 heç-heçə edib, 8 məğlubiyyətə üzülüb. 42 qol vurmuş təbrizli futbolçular 34 dəfə məyus olublar.
“Persepolis” 66 xalla çempion olub. 65 xalı olan “Sepahan” ikinci, “İstiqlal” isə 62 xalla üçüncü yeri tutub.
