UEFA bu həftə baş tutan avrokubok oyunlarından sonra həftənin oyunçusu adına namizədlərin siyahısını açıqlayıb.
Arena.az xəbər verir ki, hər üç qitəmiqyaslı turnirin ən yaxşısı adına 4 namizəd var.
UEFA Çempionlar Liqasında namizədlər bunlardır: Antuan Qrizmann (“Atletiko”, İspaniya), Rodriqo (“Real”, İspaniya), Erlinq Haland (“Mançester Siti”, İngiltərə), Bukayo Saka (“Arsenal”, İngiltərə).
Antuan Qrizmann Şotlandiya “Seltik”inə 6 cavabsız qol vurduqları ev oyununda dubla imza atıb.
Erlinq Haland da doğma meydanda İsveçrə “Yanq Boyz”unu 3:0 hesabıyla məğlub etdikləri görüşdə dubla imza atıb.
Rodriqo Portuqaliya “Braqa”sını 3:0 hesabıyla yendikləri ev oyununda 1 qol və 1 assist müəllifi olub.
Bukayo Saka da evdə İspaniya “Sevilya”sını 2:0 hesabıyla üstələdikləri görüşdə 1 qol və 1 məhsuldar ötürmə ilə yadda qalıb.
Avropa Liqasında namizədlər bunlardır: Saşa Horvat (LASK, Avstriya), Pedro Qonçalves (“Sportinq”, Portuqaliya), Maksimilian Eggeştayn (“Frayburq”, Almaniya) və Kristian Eriksen (“Molde”, Norveç).
Pedro Qonçalves Polşa “Rakuv”una evdə 2:1 hesabıyla qalib gəldikləri matçda dubl müəllifi olub.
Kristian Eriksen də səfərdə İsveç “Hakken”inə 3:1 qalib gəldikləri oyunda dubla imza atıb.
Maksimilian Eggeştayn doğma meydanda Serbiyanın “Baçka Topola” komandasına 5:0 hesabıyla qalib gəldikləri görüşdə 1 qol vurub, 2 məhsuldar ötürmə müəllifi olub.
Saşa Horvat isə Belçika “Yunion”una 3:0 hesabıyla qalib gəldikləri ev oyununda 1 qol və 1 assistlə yadda qalıb.
Avropa Konfrans Liqasında həftənin oyunçusu adına namizədlər isə bunlardır: Ceyson Svanthorsson (“Breydablik”, İslandiya), Dor Perets (“Makkabi”, Təl-Əviv, İsrail), Faris Mumbaqna (“Bodo Qlimt”, Norveç), Gift Orban (“Gent”, Belçika).
Gift Orban “Breydablik”ə səfərdə 3:2 hesabıyla qalib gəldikləri matçda het-trikə imza atıb. Rəqib komandada isə Ceyson Svanthorrson dublla yadda qalıb.
Dor Perets Ukraynanın “Zarya” komandasına səfərdə 3:1 hesabıyla qalib gəldikləri oyunda dubla imza atıb.
Faris Mumbaqna da Türkiyənin “Beşiktaş” komandası üzərindəki səfər qələbəsində dublla pay sahibi olub.
