Bu yay Fransanın “Strasburq” klubundan azad agent kimi ayrılmış müdafiəçi Aleksander Djiku “Fənərbaxça”ya transfer olunub.
Arena.az xəbər verir ki, bu barədə İstanbul təmsilçisinin rəsmi saytı məlumat yayıb.
28 yaşlı futbolçu ilə 3+1 illik müqavilə imzalanıb. İstanbul klubu onun transferi üçün əlavə xərcə düşməyib.
Mərkəz müdafiəçisi olan Aleksander Djiku “Bastiya”nın yetirməsidir. “Kan”da da forma geyinmiş futbolçu 2019-cu ildə 4,5 milyon avro qarşılığında “Strasburq”a transfer olunmuşdu. Müdafiəçi Liqa 1 təmsilçisində 127 oyuna çıxıb, 4 qol və 3 məhsuldar ötürmə ilə yadda qalıb.
Djiku Fransada dünyaya göz açsa da, Qana milli komandasında oynamağa üstünlük verib. O, Qana yığmasının heyətində meydana çıxdığı 20 oyunda 1 qol da vurub.
Yeri gəlmişkən, “Strasburq”un yarımmüdafiəçisi Dimitri Lyenar da “Bastiya”ya transfer olunub. 35 yaşlı fransız da bu klubu azad agent kimi tərk edib. O, 2013-cü ildən formasını geyindiyi “Strasburq”da 327 oyuna çıxıb, 33 qol və 44 məhsuldar ötürmə ilə yadda qalıb.
