Bu gün futbol üzrə Avropa Liqasında 1/4 final mərhələsinin cavab oyunları keçirilib.
Arena.az xəbər verir ki, bütün qarşılaşmalar eyni gündə baş tutub və eyni saatda başlayıb.
“Roma” səfərdə məğlub etdiyi “Ayaks”ı bu dəfə doğma meydanda qəbul edib. Bu qarşılaşmada qalib müəyyənləşməyib. Nəticədə növbəti mərhələyə vəsiqəni “canavarlar” qazanıblar.
“Mançester Yunayted” isə “Qranada” ilə cavab görüşündə ilk oyunda qazandığı üstünlüyünü qorumağa çalışıb. Cavab matçında da iki cavabsız qola sevinən “qırmızı şeytanlar” mərhələ adlayan tərəf olub.
“Vilyarreal” Zaqreb “Dinamo”su ilə münasibətlərinə aydınlıq gətirib. İspaniya təmsilçisi də hər iki oyunu qələbə ilə başa vurmaqla mərhələ adlayıb.
London “Arsenal”ı isə ilk oyunda qalib gələ bilmədiyi Praqa “Slaviya”sını səfərdə darmadağın edib.
Beləliklə, yarımfinalda “Roma” “Mançester Yunayted”lə, “Arsenal” isə “Vilyarreal”la qarşılaşacaq. İlk oyunlar aprelin 29-da, cavab görüşləri mayın 6-da keçiriləcək.
Avropa Liqası
1/4 finalın cavab oyunları
15 aprel
“Roma” (İtaliya) – “Ayaks” (Niderland) 1:1 (ilk oyun 2:1)
Qol: Dzeko, 72 – Brobbi, 49.
“Mançester Yunayted” (İngiltərə) – “Qranada” (İspaniya) 2:0 (2:0)
Qol: Kavani, 6. Valyexo, 90-öz qapısına.
“Slaviya” (Çexiya) – “Arsenal” (İngiltərə) 0:4 (1:1)
Qol: Pepe, 18. Lakazette, 21; 77. Saka, 24.
“Vilyarreal” (İspaniya) – “Dinamo” (Zaqreb, Xorvatiya) 2:1 (1:0)
Qol: Alkaser, 36. Moreno, 43 – Orşiç, 74.
