Türkiyənin “Samsunspor” komandasının sol vingeri Entoni Musaba bundan sonra “Fənərbağça”nın uğurları üçün çalışacaq.
Arena.az bu barədə İstanbul klubunun rəsmi saytına istinadən xəbər verir.
Niderlandlı cinah hücumçusu ilə 4,5 illik (2030-cu ilin 30 iyununadək) müqavilə imzalanıb. “Fənərbağça” bu transfer üçün Samsun təmsilçisinə 5 milyon avro ödəyib.
Entoni Musaba “Neymegen”in yetirməsidir. O, karyerası ərzində “Monako”, “Serkl Brügge”, “Herenven”, “Mets”, “Şeffild Uensdey” kimi klubların da formasını geyinib. Musaba “Samsunspor”a 2025-ci ilin yayında 1 milyon avro müqabilində “Şeffild Uensdey”dən gəlmişdi. 25 yaşlı vinger Super Liqa təmsilçisinin heyətində meydana çıxdığı 22 oyunda 6 qol vurub, 4 məhsuldar ötürmə müəllifi olub.
Musaba Niderlandın U-21 yığmasının formasını geyinsə də, ona əsas millidə debüt etmək qismət olmayıb.
“Transfermarkt” internet-portalı 25 yaşlı hücumçunun transfer dəyərini 4 milyon avro məbləğində qiymətləndirir.
