“Sabah” klubu əsas komandanın baş məşqçisi Murad Musayev ilə yeni müqavilə bağlayıb. Arena.az xəbər verir ki, bu barədə klubun rəsmi saytı məlumat yayıb.
Anlaşmaya əsasən, rusiyalı mütəxəssislə cari mövsümün sonunda bitəcək müqavilənin müddəti daha bir il – 2024-cü ilin may ayına kimi uzadılıb. Musayevin rəhbərliyi altında uğurlu mövsüm keçirməkdə olan Masazır təmsilçisi, onun daha bir il komandada qalmasına nail olub.
“Sabah”ın prezidenti Maqsud Adıgözəlov və baş məşqçi Murad Musayev yeni müqavilə ilə bağlı fikirlərini bildiriblər:
Maqsud Adıgözəlov: “Murad Musayevlə yeni müqavilə bağladığımıza görə çox şadam. Komandamız Musayevin rəhbərliyi altında gündən günə inkişaf edir. Bu, sərgilənən futbolda özünü açıq şəkildə göstərir. O, komandaya bizim klub olaraq arzuladığımız futbol fəlsəfəsini aşılayır. İnanıram ki, yeni anlaşma hər iki tərəf üçün uğurlu olacaq və birlikdə öz hədəflərimizə çatacağıq”.
Murad Musayev: “Klubumuzun bir parçası olduğuma görə çox şadam. Addım-addım daha da güclənməliyik. Qarşıda görülməli olan çox iş var. Hər gün ürəklə çalışaraq, bundan sonra da azarkeşlərimizi sevindirməyə çalışacağıq”.
Xatıraldaq ki, Musayev 2021-ci ilin 30 oktyabr tarixindən “Sabah”ın baş məşqçisidir. Komanda onun rəhbərliyi altında keçirdiyi 33 oyunun 20-dən qələbə ilə ayrılıb.
