“Roma” öz rəsmi saytında baş məşqçi Daniele De Rossi ilə əməkdaşlıq barədə klub sahibləri Den və Rayan Fridkinin birgə bəyanatını yayıb.
Arena.az “Roma”nın bu bəyanatını təqdim edir:
“Dünən Daniele De Rossi ilə görüşümüzdən sonra onun bu mövsümün sonunda və yaxın gələcəkdə “Roma”nın baş məşqçisi kimi davam edəcəyini bildirməkdən məmnunuq.
Onun bir baş məşqçi kimi qısa müddət ərzində rəhbərliyinin bütün kluba göstərdiyi müsbət təsir onun “Roma” ilə qeyri-adi tarixinin hekayəsini danışmağa davam etdi. Danielenin rəhbərliyi hörmət və cəsarətlə seçilir. Onun klubda dərin kök salmış gücü və inamı “Roma”, şəhər və azarkeşlərimizin heç kimdən geri qalmayan dəyərlərinə uyğundur.
Biz “Roma” azarkeşlərinin layiq olduğu gələcəyi təmin etmək üçün daha da böyük öhdəliklə birlikdə işləməyə davam edəcəyik. Daniele ilə uzunmüddətli layihə qurmaq fürsətindən çox şadıq.
Yaxın günlərdə daha ətraflı məlumat veriləcək. İrəli, Roma!”
Xatırladaq ki, Daniele De Rossi “canavarlar”ın sükanı arxasında yanvarın 16-da gözlənilmədən istefaya göndərilmiş portuqal mütəxəssis Joze Mourinyonu əvəz etmişdi. İtalyan mütəxəssisin paytaxt təmsilçisi ilə müqaviləsi cari mövsümün – iyun ayının sonuna qədər qüvvədədir.
De Rossi Mourinyonun başladığı işi layiqincə davam etdirir. “Canavarlar” bu mövsüm İtaliya çempionatında 31 oyuna topladıqları 55 xalla 5-ci pillədə qərarlaşıblar. İtalyan mütəxəssis “Roma”nı 16 oyuna çıxarıb, 11 qələbə qazanıb, 3 heç-heçə edib, 2 məğlubiyyət acısı yaşayıb. “Canvarlar”ın top fərqi isə 35:16 nisbətindədir.
2021-ci ilin martında Daniele De Rossi AÇ-2020-nin sonuna qədər texniki köməkçi vəzifəsini tutaraq, İtaliya yığmasında Roberto Mançininin məşqçilər qərargahında olub. İtaliya yığması AÇ-2020-də qələbə qazanıb. 2021-ci ilin avqustunda De Rossi milli komandanın məşqçilər qərargahından istefa verdiyini açıqlayıb və 2022-ci ilin oktyabrında müstəqi məşqçilik karyerasına başlayıb. De Rossi B Seriyasının təmsilçisi SPAL-ın sükanı arxasına keçib.
Daniele De Rossi 2002-2019-cu illərdə “Roma”da çıxış edib. Bu müddət ərzində dayaq yarımmüdafiəçisi bütün yarışlarda “canavarlar”ın heyətində 626 oyunda iştirak edib, 63 qol vurub, 60 məhsuldar ötürmə vedib.
“Roma” azarkeşləri Daniele De Rossini Françesko Totti ilə bərabər klubun canlı əfsanəsi adlandırırlar.
