Futbol üzrə Azərbaycan millisinin mərkəz müdafiəçisi Cəlal Hüseynov Bolqarıstanın “Arda” komandasının heyətində növbəti matçına çıxıb.
Arena.az xəbər verir ki, Cəlalın komandası 2025/2026-cı illər mövsümünün 6-cı turunda Sofiya “Slaviya”sı ilə qarşılaşıb.
Səfərdə baş tutmuş bu oyunda “Arda” məğlubiyyətə üzülüb – 0:2.
Hüseynov bu görüşdə də 90 dəqiqə meydanda olub. O, əvvəlki turlarda da 90 dəqiqə oynamışdı.
“Arda” 6 turdan sonra 5 xalla 16 iştirakçı arasında 9-cu pillədə qərarlaşıb. Komanda əvvəlki turlarda 1 qələbə qazanıb, 2 heç-heçə edib, 2 məğlubiyyətə üzülüb. Cəlalın komandasının ehtiyatda təxirə salınmış oyunu da var.
Xatırladaq ki, Cəlal Hüseynov Bolqarıstan təmsilçisi ilə 2023-cü ilin iyun ayında 3 illik müqavilə imzalayıb. Azərbaycanlı futbolçu bu komandada 58 rəsmi oyuna çıxıb, 1 qol vurub. Cəlal ötən mövsümü icarə əsasında “Şamaxı”da keçirsə də, bu yay yenidən Bolqarıstan klubuna qayıdıb.
