İtaliyanın “Milan” klubunun fransalı hücumçusu Kristofer Nkunku üç illik fasilədən sonra yenidən “Leypsiq”ə qayıdıb.
Arena.az xəbər verir ki, 28 yaşlı futbolçu “Milan”dan Almaniya klubuna icarə əsasında keçib.
Müqavilənin bir mövsümlük olduğu və “Leypsiq”ə futbolçunun transfer hüquqlarını sonradan almaq imkanı verdiyi bildirilir. Mənbələr satınalma məbləği ilə bağlı fərqli rəqəmlər açıqlasa da, əvvəlki məlumatlarda bu rəqəm 35 milyon avroya qədər göstərilib.
Nkunku “Leypsiq”də 2019-2023-cü illərdə çıxış edib və məhz bu klubda karyerasının ən parlaq dövrünü yaşayıb. Fransalı futbolçu Almaniya çempionatının ən məhsuldar oyunçularından birinə çevrilib, bombardir olub və Almaniyada ilin futbolçusu seçilib.
“Leypsiq”də keçirdiyi dörd mövsüm ərzində Nkunku 172 rəsmi matçda 70 qol və 56 məhsuldar ötürmə ilə yadda qalıb. 2023-cü ilin yayında isə “Çelsi” onun transferinə görə Almaniya klubuna 60 milyon avro ödəyib.
Fransalı hücumçu 2025-ci ilin avqustunda “Çelsi”dən “Milan”a keçmişdi. Ötən mövsüm İtaliya klubunun heyətində 35 oyuna çıxan Nkunku 8 qol və 3 məhsuldar ötürmə ilə yadda qalıb.
Beləliklə, Kristofer Nkunku karyerasının ən uğurlu dövrünü keçirdiyi kluba qayıdaraq yenidən Bundesliqada özünü göstərmək imkanı qazanıb.
