Bu yaxınlarda üçüncü övladı dünyaya gəlmiş “Bayern”in dayaq yarımmüdafiəçisi Yozua Kimmix hazırda ailə qayğıları ilə məşğuldur.
Arena.az jurnalist Maksimilian Koxa istinadən məlumat verir ki, bu xoş səbəbdən Yozua yanvarın 19-na qədər komanda ilə məşqləri buraxacaq:
“Kimmix yenidən ata olub, ana və uşaq sağlamdırlar. Kimmix cümə günü yenidən komanda ilə məşqlərə qoşulmalıdır”, deyə “Bayern”in baş məşqçisi Tomas Tuxel bildirib.
Yozua Kimmix “Bayern”ə 2015-ci ilin iyulunda 8,50 milyon avro müqabilində “Ştutqart”dan keçib. Kimmixin Münhen klubu ilə müqaviləsi 2025-ci iliin iyun ayının sonuna qədər qüvvədədir.
Cari mövsümdə Kimmix münhenlilərin heyətində bütün yarışlarda 21 oyuna çıxıb, 1 qol vurub, 6 məhsuldar ötürmə verib. Kimmixin “Bayern”in heyətində ümumi statistikası isə belədir: 368 oyun, 41 qol, 100 məhsuldar ötürmə.
Kimmix Almaniya nəhənginin heyətində 8 dəfə Almaniya Bundesliqasının, 3 dəfə Almaniya Kubokunun, 6 dəfə Almaniya Super Kubokunun və hərəsi 1 dəfə olmaqla UEFA Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
Yozua Kimmix 2016-cı ilin mayında debüt etdiyi Almaniya yığmasının heyətində 82 oyuna 6 qol və 19 məhsuldar ötürmə ilə fərqlənib. Kimmix bundestimlə 2017 FIFA Konfederasiyalar Kubokunu qazanıb. Həmçinin Yozua Almaniyanın U-19 yığması ilə Avropa çempionatının qalibi olub.
“Transfermarkt” internet-portalı 28 yaşlı dayaq yarımmüdafiəçisinin transfer dəyərini 75 milyon avro məbləğində qiymətləndirir. Alman futbolçunun adı son dövrlərdə Avropanın müxtəlif klubları ilə birgə hallanır.
