Futbolda İdman Araşdırmaları Beynəlxalq Mərkəzi (CIES Football Observatory) sosial şəbəkələrdə ən çox izləyicisi olan klubları təqdim edib.
Arena.az məlumat verir ki, Mərkəzin, 4 ən böyük sosial şəbəkə müstəvisini – “Facebook”, X, “Instagram” və “TikTok” şəbəkələrini əhatə edən arasdırmasının yekununda 100 klubdan ibarət siyahı təqdim edilib.
Siyahının zirvəsində Avropa futbolunun nəhəngi, Çempionlar Liqasının son mövsümünün qalibi “Real” qərarlaşıb. “Kral klubu” 411 milyon izləyiciyə malikdir.
2-ci yerdə Kataloniya təmsilçisi “Barselona” yer alıb. “Blauqrana”nın 361 milyon izləyicisi var.
İlk üçlüyü isə 216 milyon izləyicisi ilə İngiltərə nəhəngi “Mançester Yunayted” qapayır.
Qeyri-Avropa klubları arasında ən yüksək göstəriciyə malik klub, 54 milyon izləyici ilə Braziliyanın xalq komandası “Flamenqo”dur. Eyni sayda izləyici heyətində portuqal ulduz hücumçu Kristiano Ronaldonun yer aldığı, Səudiyyə Ərəbistanının “Əl-Nəsr”ni izləyir. Misir nəhəngi “Əl-Əhli”nin isə 51 milyon izləyicisi var.
Ümumilikdə yüzlükdə 25 ölkənin klubu təmsil edilib. Siyahıda İspaniyanın 18, İngiltərənin 17, Braziliyanın 12 və Meksikanın 6 klubu yer alıb.
Son bir ildə ən böyük artımlar yüzlüyün ilk pillələrində qərarlaşmış klublara aiddir. “Real” (+48 milyon izləyici), “İnter Mayami” (+31 milyon izləyici), “Mançester Siti” (+27 milyon izləyici) və “Əl-Nəsr” (+22 milyon izləyici) böyük artıma sahibdirlər. Nisbi baxımdan ən böyük artım (+1,348%), heyətində argentinalı ulduz hücumçu Lionel Messinin çıxış etdiyi “İnter Mayami”də qeydə alınıb.
