Bu gün AFFA İntizam Komitəsinin növbəti iclası keçirilib, İkinci Liqanın oyunları ilə bağlı müxtəlif qərarlar çıxarılıb.
Arena.az xəbər verir ki, aparılmış müzakirələrdən sonra bu turnirin 16-cı turunun oyunları ilə aşağıdakı qərarlar qəbul edilib:
“Kürmük Qax” – “Kür-Araz” oyununda “Kürmük Qax”ın futbolçusu Ramin Hacıyev hakimi təhqir etdiyinə görə birbaşa qırmızı vərəqə aldığı üçün 4 oyun cəzalanıb, klubu 300 manat cərimələnib.
“Göygöl” – “Qusar” oyununda “Göygöl”ün 4 futbolçusu sarı vərəqə aldığına görə sözügedən klub 70 manat cərimə edilib. “Göygöl”ün futbolçusu Ülvi Cəlilov təcavüzkar davranışa görə birbaşa qırmızı vərəqə aldığı üçün 1 oyun şərti olmaqla 2 oyun cəzalanıb, klubu 150 manat cərimələnib. Sınaq müddəti 3 ay təyin edilib. “Qusar”ın futbolçusu Mirmehdi Rzayev rəqibi aşkar qol imkanından məhrum etdiyinə görə birbaşa qırmızı vərəqə aldığı üçün 1 oyun cəzalanıb. “Qusar” da bu üzdən 80 manat cərimə edilib. “Qusar”ın futbolçusu Viqar Əlibabayev ikinci sarıdan qırmızı vərəqə aldığı üçün 1 oyun cəzalanıb. “Qusar” buna görə 50 manat cərimə ödəyəcək. “Qusar”ın heyətində futbolçu Emil Valehovun əvəzinə adı protokolda qeyd edilməmiş futbolçu Elnur Dəmirli oyuna daxil olduğuna görə “Qusar”a 0:3 hesablı texniki məğlubiyyət verilib. “Qusar” 400 manat cərimə də edilib.
“Füzuli” – “Dinamo” oyununda “Dinamo”nun 4 futbolçusu sarı vərəqə aldığına görə sözügedən klub 70 manat cərimə edilib.
“Şəmkir” – “Şəfa” oyununda “Şəfa”nın futbolçusu Nicat Abbasov azarkeşləri təhqir etdiyinə görə birbaşa qırmızı vərəqə aldığı üçün 4 oyun cəzalanıb, klubu 350 manat cərimə edilib. “Şəfa”nın futbolçusu Ramiz Qasımov ikinci sarıdan qırmızı vərəqə aldıqdan sonra oyunun baş hakimi və azarkeşləri təhqir etdiyinə görə 4 oyun cəzalanıb, klubu 350 manat cərimə edilib.
“Lerik” – “Ağdaş” oyununun 75-ci dəqiqəsində “Lerik”in futbolçusu Azad Bayramzadə ikinci sarıdan qırmızı vərəqə aldığı üçün 1 oyun cəzalanıb. Onun klubu da 50 manat cərimə edilib. “Lerik”in azarkeşləri tərəfindən pirotexniki vasitədən istifadə edildiyinə görə klub 150 manat cərimələnib.
