Serbiyanın paytaxtı Belqradda boks üzrə dünya çempionatı davam edir. Arena.az xəbər verir ki, bu gün 1/8 final mərhələsinə yekun vurulub.
Mərhələnin ikinci günündə Azərbaycan millisinin 2 üzvü rinqə çıxıb. Monqolustanlı Enxmandağ Xarxuunu mübarizədən kənarlaşdıran Məsud Yusifzadə (51 kq) bu gün 1/8 finalda puerto-rikolu Yankiel Rivera ilə döyüşüb. Görüş təmsilçimizin qələbəsi ilə yekunlaşıb – 5:0 (30:27, 30:27, 30:27, 30:27, 29:28). O, növbəti qarşılaşmasını noyabrın 2-də tailandlı Tanarat Saengfetə qarşı keçirəcək.
1/16 finalda Soma Mesterə (Macarıstan) qalib gələn Mirşərif Kazımzadə (75 kq) ikinci sınağında Səidcəmşid Cəfərovla (Özbəkistan) gücünü yoxlayıb. Görüş rəqibin qələbəsi ilə yekunlaşdığından boksçumuz dünya çempionatında çıxışını dayandırıb.
Sabah baş tutacaq 1/4 finalda Azərbaycan millisinin 4 üzvü rinqə çıxacaq. Yusifzadədən başqa, Sərxan Əliyev (71 kq) Obed Bartilə (ABŞ), Alfonso Dominqes (86 kq) Şarabutdin Atayevlə (Rusiya) və Məhəmməd Abdullayev (+92 kq) Narenderlə (Hindistan) münasibətinə aydınlıq gətirəcək.
Bu dünya çempionatı ilk dəfə 13 çəki dərəcəsində təşkil olunub. Mundialda 105 ölkədən 650 idmançı iştirak edir. 2 600 000 ABŞ dolları mükafat fondu olan yarışda çempion olacaq boksçular 100 000 dollar qazanacaq. İkinci yerin sahibi 50 000 dollar, üçüncü pilləni tutacaq boksçu 25 000 dollar mükafat alacaq.
