Xorvatiya millisinin kapitanı Luka Modriç dünya çempionatları tarixində ən çox oyun keçirən futbolçular siyahısında ilk beşliyə daxil olub.
Arena.az xəbər verir ki, 40 yaşlı yarımmüdafiəçi DÇ-2026-nın 1/16 finalında Portuqaliyaya qarşı start heyətində meydana çıxmaqla mundiallarda 23-cü matçını keçirib.
Bununla o, bu göstəricidə italiyalı Paolo Maldini və almaniyalı Manuel Noyerə çatıb.
Hazırda dünya çempionatları tarixində ən çox oyun keçirən futbolçuların ilk beşliyi belədir:
- Lionel Messi (Argentina) – 29 oyun
- Kristiano Ronaldo (Portuqaliya) – 26 oyun
- Lotar Matteus (Almaniya) – 25 oyun
- Miroslav Kloze (Almaniya) – 24 oyun
- Luka Modriç (Xorvatiya), Paolo Maldini (İtaliya) və Manuel Noyer (Almaniya) – hərəyə 23 oyun
Bununla yanaşı, Portuqaliyaya 1:2 hesabı ilə uduzan Xorvatiya mundialla vidalaşıb. Bu görüşün Modriç üçün dünya çempionatlarında son oyun olması ehtimal edilir.
İtaliyanın tanınmış jurnalisti Nikolo Skiranın daha əvvəl yaydığı məlumata görə, təcrübəli futbolçu DÇ-2026 başa çatdıqdan sonra karyerasını bitirməyi planlaşdırır. Lakin Modriç özü hələlik gələcəyi ilə bağlı rəsmi açıqlama verməyib.
Hazırda İtaliyanın “Milan” klubunda çıxış edən Luka Modriç dünya futbolunun ən uğurlu yarımmüdafiəçilərindən biri hesab olunur. O, karyerası ərzində altı dəfə UEFA Çempionlar Liqasının qalibi olub, 2018-ci ildə “Qızıl top” mükafatına layiq görülüb. Xorvatiya millisinin heyətində isə 2018-ci ildə dünya çempionatının gümüş, 2022-ci ildə isə bürünc medalını qazanıb.
DÇ-2026 Modriçin karyerasında iştirak etdiyi beşinci dünya çempionatı olub. Təcrübəli futbolçunun mundiallardakı 23 oyunu onu turnir tarixinin ən çox forma geyinən futbolçuları sırasında ilk beşliyə yüksəldib.
