“Mançester Siti”inin ispan baş məşqçisi Xosep Qvardiola İngiltərə Premyer Liqasının 2023/2024-cü illər mövsümünün ən yaxşı məşqçisi seçilib.
Arena.az bu barədə İngiltərə Premyer Liqasının rəsmi saytına istinadən məlumat verir.
Cari mövsümdə Qvardiolanın “şəhərlilər”i 91 xal toplayaraq, ardıcıl 4-cü dəfə İngiltərə Premyer Liqasının qalibi olublar və bu, mütləq rekord olaraq əlamətdardır.
İspan mütəxəssis təltif edilməsi münasibətilə fikirlərini bildirib:
“Mən bu mükafatı bölüşmək istəyirəm! Xüsusilə Mikel Arteta son oyuna qədər etdiyi inanılmaz iş üçün qənimət yarışında gərginliyi son həddə çatdırdı. Əlbəttə ki, Yurgen Klopp ilə illər ərzində unudulmaz döyüş üçün. Və Unai Emeri ilə, o, yenidən “Aston Villa”nı Çempionlar Liqasına çıxararaq inanılmaz bir şey etdi. Andoni İraola isə Premyer Liqadakı ilk mövsümündə çətin bir başlanğıcdan dirçələrək, “Bornmut”da etdiklərinə görə.
Onlarla birgə çalışmaq və bu kuboku qazanmaq böyük şərəfdir. Gələcəkdə bu mükafatı qorumağa çalışacağıq”, deyə “Pep” vurğulayıb.
Xosep Qvardiola “Mançester Siti”ni 2016-cı ilin iyul ayından çalışdırır. İspan mütəxəssisin “şəhərlilər”lə cari əmək müqaviləsi 2025-ci ilin iyun ayının sonuna qədər qüvvədədir. “Şəhərlilər” bu müddətdə “Pep”in rəhbərliyi altında 471 oyun keçiriblər, 349 qələbə qazanıb, 57 heç-heçə ediblər, 65 məğlubiyyətə üzülüblər. Top fərqi isə 1195:471 nisbətindədir.
Bu müddətdə “Pep” “Mançester Siti”nin futbol tarixinin ən şanlı salnaməsini yaradıb. Qvardiola “şəhərlilər”ə 6 dəfə İngiltərə Premyer Liqasını, 2 dəfə İngiltərə Kubokunu, 4 dəfə İngiltərə Liqa Kubokunu, 2 dəfə İngiltərə Super Kubokunu, UEFA Çempionlar Liqasını, UEFA Super Kubokunu və FIFA Klub Dünya Kubokunu qazandırıb.
