Fransanın “Lans” klubunun hücumameyilli yarımmüdafiəçisi David Pereyra da Kosta bundan sonra “Portland Timbers”in formasını geyinəcək.
Arena.az bu barədə Amerika Birləşmiş Ştatları (ABŞ) klubunun rəsmi saytına istinadən xəbər verir.
MLS-də çıxış edən sözügedən klub bu transferi 5,74 milyon avroya rəsmiləşdirib. 24 yaşlı portuqaliyalı futbolçu ilə müddəti 2028-ci ilin 31 dekabrına qədər nəzərdə tutulmuş müqavilə imzalanıb.
David da Kosta “Lans”ın öz yetirməsidir. O, 2020-ci ildən Fransa klubunun əsas komandasında çıxış edirdi. Yarımmüdafiəçi bu komandada 123 oyuna çıxıb, 10 qol vurub, 13 məhsuldar ötürmə müəllifi olub.
David Portuqaliyanın U-18, U-19 və U-21 yığmalarında forma geyinsə də, əsas millidə debüt şansı qazanmayıb.
“Transfermarkt” internet-portalı 24 yaşlı yarımmüdafiəçinin transfer dəyərini 7 milyon avro məbləğində qiymətləndirir.
