“Real”ın baş məşqçisi Karlo Ançelotti İspaniya çempionatının 11-ci turunda “el klasiko”da “Barselona” üzərində qələbəsini (1:2) şərh edib.
Arena.az “Real”ın rəsmi saytına istinadən Ançelottinin bu barədə fikirlərini təqdim edir:
“Bəzən istədiyin kimi oynamırsan. İlk hissədə ən yaxşı səviyyədə çıxış edə bilmədik. Bu baş verə bilər. Başlanğıcda fəsadlar yaşadıq və fərdi çıxışlarımızda o qədər də inandırıcı deyildik. Xoşbəxtlikdən, ikinci hissə fərqli keçdi və qələbə qazana bildik. Məqsədimiz heç-heçə yox, qələbə idi. Hesabı bərabərləşdirəndə dinamikanı dəyişə bildik. Bu, bizə daha çox güc verdi və “Barselona”nı zəiflətdi, çünki o vaxta qədər daha yaxşı oynayırdılar. Bu, çox çətin meydanda üç xaldır. Çoxlu səfər oyunları keçirdik. Yeddi liqa oyunundan beşi çox çətin keçdi. Oyun təqvimi bizdən çox şey tələb edirdi və biz çox yaxşı çıxış etdik”, deyə italyan mütəxəssis razılıqla bildirib.
Bundan əlavə, italyan mütəxəssis birinci hissədən sonra hesabda geri olan yetirmələrinə fasilə zamanı nə dediyini də açıqlayıb:
“Mən onlara dedim ki, belə oyunları uduzmaq olar, amma uduzsaq, bunu fərqli etməliyik, təkbətək mübarizələrdə daha aqressiv olmaqla. İkinci hissədə gördüklərimə görə, yetirmələrim, görünür, dediklərimlə razılaşıblar”, deyə o, təxmini haqda danışıb.
Ançelotti oyunun qəhrəmanı, ingilis mərkəz yarımmüdafiəçisi Cud Bellingemdən də danışıb:
“Cud asanlıqla 20 və ya 25 qol vura bilər. Onun qolçu olduğunu düşünmürük, amma hazırda çoxlu qollar vurur. Bununla belə, hücumçulardan da eynisini gözləyirik”.
Xatırladaq ki, “Real” Bellingemin dublu sayəsində “el klasiko”da əzmkar səfər qələbəsi qazanaraq, 28 xalla La Liqanın turnir cədvəlinə başçılıq edir. Eyni miqdar xal toplamış “Jirona” 2-ci pillədə qərarlaşıb. “Barselona” isə 24 xalla 3-cü pillədədir.
