“Real”ın baş məşqçisi Karlo Ançelotti “qaymaqlılar”ın UEFA Super Kubokunda “Atalanta” üzərində qazandığı qələbədən (2:0) danışıb.
Arena.az AS dərgisinə istinadən, italyan mütəxəssisin bu barədə fikrini təqdim edir:
“Bu gecələri burada yaşamaq mənim üçün şərəf və bir imtiyazdır. Əzab, mübarizə və qələbə…
Birinci hissədə bizim üçün azacıq çətin oldu, çünki “Atalanta” güclü təpki etdi və müdafiədə çox yaxşı oynadı. “Atalanta”nın təkbətək mübarizələri bizdən daha çox qazanması bizim üçün böyük çətinliklər yaratdı. İkinci hissədə isə oyun azacıq açıldı, italyanlar yoruldular, bizim isə daha çox məkanımız yarandı. Azad məkanlar olduqda, Rodriqo, Vinisius və Mbappe çox təhlükəlidirlər. Kilian çoxlu qol vurmaq üçün tələb edilən bacarıqlara malikdir.
Bir həftə əvvəl gəlmiş futbolçular yaxşı formada idilər. Mən bunu yüksək qiymətləndirirəm. Hər oyunda işləmək, mübarizə aparmaq və yarışmaq gərəkdir”, deyə Ançelotti vurğulayıb.
Xatırladaq ki, “Real” tarixində 6-cı dəfə UEFA Super Kubokunun qalibi olub ki, bu da mütləq rekorddur.
