“Mançester Siti”nin belçikalı yarımmüdafiəçisi Kevin De Bröyne zədəsini sağaldıb və komanda ilə ümumi dəstədə məşqlərə qayıdıb.
Arena.az bu barədə “Mançester Siti”nin mətbuat xidmətinə istinadən məlumat verir:
“Geri dönüşün xoş olsun”, – “şəhərlilər”in mətbuat xidməti klubun rəsmi sosial şəbəkə hesabarı üzərindən belçikalı futbolçunun məşqdən şəklini paylaşaraq, şərh edib.
Xatırladaq ki, De Bröyne sentyabrın 18-də Çempionlar Liqasında “İnter”lə oyunda əzələsindən zədə alıb, futbolçu o vaxtdan meydanda olmayıb.
Kevin De Bröyne “Mançester Siti”yə 2015-ci ilin avqustunda 76 milyon avro məbləğ müqabilində “Volfsburq”dan keçib. Belçikalı hücumameylli yarımmüdafiəçinin “Mançester Siti” ilə müqaviləsi 2025-ci ilin iyun ayının sonuna qədər qüvvədədir.
Geridə qalmış 2023/2024-cü illər mövsümündə De Bröyne bir müddət zədə səbəbindən oynamasa da, “şəhərlilər”in heyətində aparıcı futbolçulardan biri olub. Belçikalı futbolçu ötən mövsüm meydana qayıtdıqdan sonra “Mançester Siti”nin heyətində 26 oyuna 6 qol vurub, 18 məhsuldar ötürmə verib.
Yenicə başlamış cari mövsümdə isə Kevin “Mançester Siti” üçün 6 oyun keçirib, 1 qol və 1 məhsuldar ötürmə ilə fərqlənib.
De Bröyne “şəhərlilər”in heyətində ümumilikdə 388 oyun keçirib, 103 qol və 171 məhsuldar ötürmə müəllifi olub.
Kevin 2010-cu ilin avqustunda debüt etdiyi və hazırda kapitanı olduğu Belçika yığmasının heyətində 107 oyun keçirib, 30 qol vurub, 49 məhsuldar ötürmə verib.
“Transfermarkt” internet-portalı 33 yaşlı belçikalı hücumameylli yarımmüdafiəçinin transfer dəyərini 45 milyon avro məbləğində qiymətləndirir.
