Almaniyanın Birinci və İkinci Bundesliqası 2024/2025-ci illər mövsümünün yekunları üzrə ziyarətçilərin sayında rekord müəyyənləşdiriblər.
Arena.az bu barədə müvafiq yarışların təşkilinə cavabdeh olan Alman Futbol Liqasının (DFL) rəsmi saytına istinadən məlumat verir.
Mənbənin məlumatına görə, ümumilikdə 36 kluba satılmış biletlərin sayı 20983964 ədəd təşkil edib, ümumi ziyarətçi sayı isə hər oyunda orta hesabla 34288 nəfər olub.
Biletlərin təxminən 11 milyonu Birinci Bundesliqanın payına düşüb. İkinci Bundesliqada hər oyun orta hesabla 30493 nəfər ziyarətçi təşkil edib ki, bu da yeni rekorddur.
Təhlilçilər “Köln” və “Hamburq”un yeni mövsümdə Birinci Bundesliqada mübarizə aparacağını nəzərə alaraq, İkinci Bundesliqada ziyarətçi sayının artımını gözləmirlər.
Almaniya Futbol Liqasının direktoru Mark Lentsin qənaətincə, müvafiq yüksək göstəricilərə stadionların yüksək təhlükəsizlik ölçüləri və biletlərin münasib qiymətləri kimi amillər təsirini göstərib.
